XXI. mende hasierako haur eta gazte literatura / Xabier Etxaniz Erle, Jose Manuel López Gaseni

"90eko hamarkadako Haur eta Gazte Literatura" liburuan hamarkada hartako egoera aztertu genuen, generoka, obra garrantzitsuenak, aldaketa esanguratsuenak, eta abat. Eskuartean duzun liburu hau haren jarraipena da; sarrera historiko baten ondoren, generoka XXI. mendeko lehen hamarkadan izandako garapena eskaintzen da; hurrena, kanonari buruzko azterketa bat egiten da, egungo sistemaren egoera eta erronkekin amaitzeko. Liburu honek helburu argiak ditu: alde batetik, egungo egoeraren berri eman, zer argitaratu den, nork, zertaz, nolako generoak... eta hortik abiatuta, gure literaturak nolako erronkak dituen aurrera egiteko, gero eta literatura osatuagoa eta erakargarriagoa eskaini ahal izateko; eta, bestetik, ikerketa honek beste batzuetarako abiapuntua izan nahi du; azkenik, espero eta desio dugu lan hau baliagarria gertatzea HGLra hurbildu nahi duten guztientzat, literaturaren mundutik zein hezkuntzarenetik.