Ahozko hizkuntza lantzen : Haur Hezkuntzan hasi eta unibertsitateraino / monografikoaren koordinatzaileak, Matilde Sainz Osinaga, Arantza Ozaeta eta Eneritz Garro (HUEZIko MIKER taldekideak)

2009ko Hik Hasi Udako Topaketetan hezitzaileak eta interesa zuen oro jantzi nahian, "Ahozko hizkuntza lantzen: Haur Hezkuntzan hasi eta unibertsitateraino" ikastaroa eskaini zuen Mondragon Unibertsitateko Humanitate eta Hezkuntza Zientzien (HUEZI) fakultateko MIKER taldeak. Ikastaro hartan, besteak beste, hizkuntzaren ahozko trebetasuna lantzeko irakasleen prestakuntzaz, ahozkoa irakasgarri bihurtzeko moduez, ikasgelako ahozko elkarrekintzaz, ahozkotasuna eta hizkuntzen programazio bateratuaz eta horiek guztiak programatzeko eta ebaluatzeko irizpideez aritu ziren. Ikastaroan jorratutako arloek duten interesgarritasunaz eta erabilgarritasunaz jabeturik, Hik Hasik ikastaroan eskainitakoa bertan izan ziren parte hartzaileez gainera, gaian jakinmina eta beharra duen edonori aurkeztu eta eskaini nahi dio lan honen bidez.