Literatura ikasgelan [Interneteko baliabidea] / [egilea] Aitor Ortiz de Pinedo

Lan honetan, ipuin literarioak landu dira. Asmoa izan da ikuspegi komunikatibo batetik lantzea testuok. Zenbait euskal ipuin ere badira, nahiz eta gehienak mundu zabaleko idazleen kontakizun laburrak izan. Gogoan izan da, batez ere, ikasle helduak, nahiz eta umeentzat ariketaren bat ere egon. Euskara aldetik EGAtik gorako hizkuntza maila eskatzen da. Irakurmena landuko da. Baita mintzatzeko aukera ematen duten ariketak ere. Beste zenbait ariketa, ordea, literaturaren inguruko gaiak jorratzeko dira: kritika literarioak, irakurzaletasunaren inguruan, literaturaren eginkizun soziala… Aukeratutako testuak sarean daude publikoaren eskuragarri. Batzuetan, testu horiek txertatu egin dira dokumentu honetan. Luzeak diren kasuan interneteko helbidea eman da. Emailuen bloga izenekoa da Iturririk erabiliena. Kontuan hartu da, batetik, ipuinen hizkuntzaren kalitatea eta, bestetik, kontakizunen erakargarritasuna. Testuak bere horretan eman dira, inoiz Euskaltzaindiaren arauak aplikatuz aldaketak egin badira ere. Saretik atzitutako testu literarioen ortografia-gaurkotze minimoa besterik ez da egin, eskua gehiegi sartu gabe. Proposatzen diren ariketak taldeka lan egiteko pentsatuta daude sarri.