Irakurriaren ulermena [Interneteko baliabidea] : Lehen Hezkuntzan irakurriaren ulermena lantzeko sekuentziak / [egilea] Ana Idirin Zuluaga

Arrigorriagako eskolan, hausnarketa-prozesu baten ostean, guztiz beharrezkotzat jo genuen gure ikasleekin ahozkoaren zein irakurriaren ulermena lantzea, eta horrela jaso genuen gure Hobekuntza Planean. Lehen-lehenik, irakurriaren ulermena lantzeko materialak sortzeari ekin genion, eta horixe da, hain zuzen ere, proiektu honen helburua. Irakurtzea prozesu aktiboa da: edozein testu ulertzeko, irakurleak testua interpretatu egin behar du, eta, horretarako, zenbait estrategia aktibatu. Eskolaren zeregin garrantzitsuenetariko bat ikasleei irakurtzen irakastea da. Irakasprozesu horretan, mikroabileziak ez ezik, zenbait makroestrategia ere garatu behar dituzte ikasleek. Gure helburua ikasleak estrategia horietan trebatzea da; batetik, testu mota ezberdinak irakurtzeko orduan autonomoak izan daitezen, eta, bestetik, testuetan ematen den informazioa ulertuta, ikasteko gaitasuna gara dezaten. Horretarako, zenbait testu aukeratu, eta horien gaineko lan-sekuentzia bana prestatu dugu. Landuko ditugun estrategiak honako hauek dira: testuan datuak lokalizatzea; antizipazioak egitea; testu barruko datuak inferitzea, baliabide anaforikoei erreparatuta; testutik kanpoko inferentziak egitea, munduari buruz duten aurrezagutzaz baliatuta; ideia nagusia eta bigarren mailako ideiak bereiztea; laburpenak egitea... Lan-sekuentzia guztiek 4 atal hauek dituzte: o Irakurri aurretik o Irakurri bitartean o Irakurri ondoren o Ebaluazioa