Muga beroak / [Juan Mari Lekuona ; azala eta marrazkiak, Edorta Kortadi]

Juan Mari Lekuona-ren liburua, maila eta era desberdinetan, gure azken urteotako historiaren ilustrazione bizikor eta interesgarria da. Berdin esan liteke poesi-joeraren xehetasunei, gaien aukeratze, erabiltze, eta estiloaren problemei gagozkielarik ere. Ez dugu uste alde horretatik begiratuta, Lekuona-rena bezain liburu garrantzitsu askorik gure artean argitaratu denik. Berak horrela nahi izan du gainera; hori nabarmen dago liburuaren egituran bertan; bera nondik datorren eta nora heldu den erakutsi nahi izan du. Ez ditu ukatu, ez estali molde, influentzi eta jokabideak. Bestalde, liburua hiru zati eginaz, zati bakoitzaren ahaide eta berezitasunak markatuz, bere burua osotasun horretan agertu du. Eta guzti horren hoberena zera da: ez duela, egin duen hori eta egin duen horretarik, deus ere pasiboki egin, jakinaren gainean baizik. Kontradizioak gaindituz, eta, bere nortasun orokarrarekin batera, nortasun poetikoa tinkotuz.